STOBE

Nach dem mer en chlini Parkourschuel ufzoge händ ond die mehrheitlech zomene Sälbstläufer worde esch, händ mer vo Nurf oise Horizont welle erwitere ond ois ufd Suechi nach noie Herusforderige gmacht. Es het ois scho lang greizt en Teil zom kulturelle Läbe vo Aarau bizträge ond dorom händ mer en Plattform gsuecht, wo das möglech esch.

Inere Zwöschenotzig a de Rothusgass händ mer genau so en Rüümlechkeit gfonde. Mer händ wärtvolli Erfahrige chöne sammle em plane, organisiere ond dorefüehre vo vellne onterschedleche Verastaltige. Wiiter hämer au ersti Kontäkt gchnöpft met Leferante, händ ois demet usenandergsetzt, wie mer oisi Gäst möglechst sempel chönd erreiche, ois met de verschedne Behörde vo de Stadt Aarau in Verbindig gsetzt ond mer händ usegfonde, dass mer gar kei schlächti Gattig mache, wenn mer hender de Bar stönd.

Was aber för ois no vell wechtiger gsi esch, mer händ chöne usefende, was ois spass macht ond was ehner weniger. So esch es dezue cho, dass mer e de Stobe Konzärt, Filmöbe, Chleidertuschbörse, Konstusstellige, Töggelitornier ond velli witeri Events verastaltet händ. Die Erfahrige händ ois debi gholfe en klareri Vorstellig dröber z becho, i welli Rechtig mer ois met oisere Nurf Culture GmbH zuekönftig wänd entweckle.
Ide Stobe hemmer es halbs Johr mol einisch ganz anderi sache als Parkour döffe usprobiere. Es het ersti Konzertli geh, wo tanzt, gfestet oder au eifach nor ufmerksam zueglost worde esch.
D'Stobe esch för eus en ufriebendi, spannendi ond schlossendlech super gueti Erfahrig gsi.

vergangeni Verastaltige

För jede Ahlass hets s Passende Plakat gäh...

Föteli

Diversi Föteli us de Stobe...